2.2 நான்மணிக்கடிகை

நான்மணிக்கடிகை பதினெண்கீழ்க்கணக்கு நூல்களுள் ஒன்று. இஃது ஒரு அற / நீதி நூல்.விளம்பி நாகனார் என்னும் புலவரால் இயற்றப்பட்ட இந்நூல் நூற்றியொரு பாடல்களைத் தன்னகத்தே கொண்டுள்ளது

நான்மணிக்கடிகை என்பது நான்கு இரத்தினத் துண்டங்கள் என்னும் பொருளைத் தரும். ஒவ்வொரு பாடலிலும் நான்கு சிறந்த கருத்துக்களைக் கூறுவதால் இப் பெயர் பெற்றது.

இந் நூலில் உள்ள கடவுள் வாழ்த்துச் செய்யுட்கள் இரண்டும் மாயவனைப் பற்றியவை.

கடவுள் வாழ்த்து

மதி மன்னும் மாயவன் வாள் முகம் ஒக்கும்;

கதிர் சேர்ந்த ஞாயிறு சக்கரம் ஒக்கும்;

முது நீர்ப் பழனத்துத் தாமரைத் தாளின்

எதிர் மலர் மற்று அவன் கண் ஒக்கும்; பூவைப்

புது மலர் ஒக்கும், நிறம்.

· பழனம் – வயல்

· பூவைப்பூ – காயாம்பூ

பொருள்: நிலவானது நிலைத்த பேறுடைய திருமாலின் முகத்தை ஒத்திருக்கும். ஒளிரும் ஞாயிறு அவனது சக்கரத்தை ஒத்திருக்கும். வயலில் காணப்படும் தாமரை அவனது கண்களை ஒத்திருக்கும். காயாம்பூவானது அவனது திருமேனி நிறத்தை ஒத்திருக்கும்.

படியை மடியகத்து இட்டான்; அடியினான்

முக் கால் கடந்தான் முழுநிலம்; அக் காலத்து

ஆன் நிரை தாங்கிய, குன்று எடுத்தான்; – சோவின்

அருமை அழித்த மகன்.

· படி – உலகம்

· மடி – வயிறு

பொருள்: உலகத்தைத் தன் வயிற்றுக்குள் அடக்கியவனான திருமால் தன் திருவடிகளால் மூவுலகத்தையும் அளந்தான். பசுக்களின் குளிரைப் போக்குவதற்காகக் கோவர்த்தன கிரியைக் குடையாகப் பிடித்தான். பாணாசுரனது நெருப்பு மதிலை அழித்து அநிருத்தனை மீட்டான்.